Ўзбекистон иқтисодиётига талаб тарафидан ички ва ташқи омиллар таъсир кўрсатмоқда. Сўнгги ойларда ўсиб бораётган ташқи инфляция фони, уй хўжаликлари даромадларининг ўсиши билан бирга, базавий инфлятсиянинг нисбатан кучли динамикасида намоён бўлди.
Бу ҳақда Марказий банк шарҳида айтилади.
Регуляторнинг фикрича, сўнгги чоракларда иқтисодий ўсишнинг барқарор юқори динамикаси кузатилмоқда.
Талаб томонининг асосий омили нисбатан ўртача инвеститсия фаоллиги билан ялпи истеъмолнинг ўсиши бўлди. 2022-йил якуни бўйича ЯИМ ўсиш суръати Марказий банкнинг октабр ойидаги прогнозига яқин шаклланиб, 5,7% ни ташкил этди.
“Бу йилги фискал рағбатлантиришнинг нисбий мўтадиллиги кутилаётганига қарамай, олдинги 3 йилдаги юқори бюджет тақчиллигининг ялпи талабга кечиктирилган таъсири ҳали ҳам муҳимлигича қолмоқда.
Меҳнат бозорида барқарорликни таъминлаш, иш ҳақининг ўсиши ва трансчегаравий пул ўтказмаларининг сезиларли ҳажмлари узоқ муддат фойдаланиладиган товарларга, шунингдек, кўчмас мулкка бўлган талабнинг ошишига хизмат қилмоқда, бу эса, ўз навбатида, ушбу сегментлардаги нархларнинг ошишида намоён бўлмоқда.
Умуман олганда, келгуси чоракларда иқтисодий фаолликнинг қулай тендентсияларининг шаклланиши таклиф омилларининг барқарорлигига боғлиқ бўлади.
Шу билан бирга, айрим турдаги товарларни ишлаб чиқариш ва етказиб беришга таъсир кўрсатиши мумкин бўлган ғайритабиий об-ҳаво шароитлари билан боғлиқ бўлган қисқа муддатли таъминот хавфи мавжуд.