2023-йилнинг биринчи чорагида «Ўзбекнефтгаз» экспорт прогнозини 16,3 фоизга оширди.

«Ўзбекнефтгаз» акциядорлик жамияти 2023-йилнинг биринчи чорагида маҳсулот ва хизматлар экспорти рекордини ўрнатди.

Экспортнинг умумий ҳажми белгиланган прогноздан ошиб, 87,5 миллион АҚШ долларига етди, бу эса белгиланган кўрсаткичдан 16,3 фоизга кўпдир.

Компания экспортидаги асосий улушни полиетилен (51%) ва саноат хизматлари (15%) ташкил этди.

Шунингдек, экспортнинг салмоқли қисми Uzbekistan GTL заводида ишлаб чиқарилган синтетик нафта маҳсулотларига тўғри келади.

Маълумотларга кўра, заводда ишлаб чиқарилаётган синтетик дизел ёқилғисининг экспорт нархи Ўзбекистон Республика товар-хом ашё биржаси орқали доимий равишда аукционга қўйилиб келинмоқда.

Айни пайтда нарх 1 тонна учун 747,1 Ақш долларига туширилган.

«Ўзбекнефтгаз» акциядорлик жамияти маҳсулотлари дунёнинг 18 давлатига экспорт қилиниб, Туркия, Латвия, Афғонистон, Бирлашган Араб Амирликлари, Хитой ва Россия асосий экспорт ҳамкорлари ҳисобланади.

Компания 2023-йилда маҳсулот ва хизматлар экспортини оширишни режалаштирган ва январ-апрел ойлари якунларига кўра, экспорт режаларини 104 фоизга бажаришни мўлжалламоқда.