Қишлоқ хўжалиги вазирлиги мультимедиа марказининг маълум қилишича, 2019 йилнинг март ойида Қишлоқ хўжалиги вазирлиги ва Бирлашган Араб Амирликлари Industrial Innovation Group МЧЖ ўртасида 181,9 миллион евро миқдорида тўғридан-тўғри хорижий инвестициялар жалб этиш бўйича келишув имзоланган.
Сирдарё вилоятида таркибида целлюлоза (каннабис (Cannabis sativa L.), зиғир (Linum usitatissimum L.) бўлган экинларни етиштириш, қишлоқ хўжалиги хомашёсини чуқур қайта ишлаш ва рақобатбардош, экспортбоп маҳсулот етиштиришни ташкил этиш режалаштирилган эди.
Ўзбекистон Республикаси Вазирлар Маҳкамасининг 2019-йил 18-июндаги «Сирдарё вилоятида агросаноат кластерини ташкил этиш чора-тадбирлари тўғрисида»ги қарори асосида Амирликнинг Industrial Innovation Group компаниясига қарашли «РС Success Agro» МЧЖ ташкил этилган.
2019-йилда мазкур масъулияти чекланган жамиятга қишлоқ хўжалиги маҳсулотлари етиштириш учун 5 минг гектар ер майдонини узоқ муддатли ижарага бериш ва 5 йил ичида 25 минг гектарга етказиш бўйича қарор қабул қилинди.
«RS Success Agro» агрокластери республикамизда фаолият юритаётган биринчи лицензиат ҳисобланиб, Сирдарё вилояти Ховос туманида фаолият юритмоқда.
Корхонада саноат наша ўсимликларини кўпайтириш ва экишдан тортиб, қайта ишлаш ва экспорт учун тайёр маҳсулот ишлаб чиқаришгача бўлган тўлиқ қиймат занжири яратилди.
Бугунги кунга қадар агрокластерда жами 3 минг 879 гектар майдон мавжуд бўлиб, 2022-йил ҳосили учун 585 гектар каноп, 100 гектарга амарант, 60 гектар жўхори экилди.
Қолган майдонларда тупроқ унумдорлигини ошириш мақсадида дуккакли экинлар, кузги арпа ва хантал экилади.
Ўзбекистондаги «RS Success Agro» заводида ишлаб чиқарилган наша мойи Давлат санитария-эпидемиология назоратининг хавфсизлик хулосаси, шунингдек Хитой, Ақш, Швейцария, Словакия, Россия, Германия, Бирлашган Араб Амирликлари ва бошқа давлатларнинг сертификатлаштириш органларидан сифат ва хавфсизлик сертификатларини олди. Ушбу маҳсулот таркибида тетраҳидроканнабинол йўқлиги алоҳида таъкидланган.
Лицензиат Франция ва Россияда ишлаб чиқарилган, тола ва мой ишлаб чиқаришга мўлжалланган, уруғи халқаро талабларга жавоб берадиган «Федора 17», «Феримон 12», «Сантика 27», «Родник» каноп навларини етиштирмоқда. Уруғлик паспортларига кўра, санаб ўтилган навлардаги тетраҳидроканнабинол (ТҲC) миқдори 0,2 фоиздан ошмаслиги кафолатланган.
Ўзбекистонда биринчи марта наша етиштирилаётгани боис хориждан келтирилган навларнинг маҳаллий тупроқ-иқлим шароитига мослашуви, шўрланиш ва сувсизланишга чидамлилиги бўйича синовлар давом этмоқда.
Қишлоқ хўжалиги вазирлиги томонидан мазкур фаолият турига жалб этилган хорижий ва маҳаллий инвесторларни жалб этиш бўйича қатор ишлар амалга оширилмоқда.
Хусусан, Ақш, Италия, Ҳиндистон, Мальта ва Жанубий Кореянинг йирик сармоядорлари билан яқин алоқалар олиб борилмоқда, дейилади хабарда.