Ўзбекистон биржасида ун, шакар ва полиетилен нархи арзонлашди

“Ўзбекистон Республика товар-хомашё биржаси” АЖнинг барча савдо майдончаларида 5—11-сентабр кунлари 2688,9 миллиард сўмлик товар сотилди, бу ўтган ҳафтага нисбатан 35,6% га кўпдир.

ЎзРТХБ матбуот хизмати хабарига кўра, савдоларнинг 80,7% биржа аукционлари, 0,5% кўргазма-ярмарка савдолари, 18,6% давлат харидлари ва 0,2% автомобил рақамларининг онлайн-аукцион савдоларига тўғри келди.

Кичик бизнес ва хусусий тадбиркорлик субектлари иштирокида тузилган битимларнинг умумий ҳажми 721,6 миллиард сўмни ташкил этди. Давлат харидлари бўйича ўтказилган электрон ауксионлар натижасида бюджет ва корпоратив буюртмачиларнинг жами жамғармалари 99,9 миллиард сўмни ташкил этди.

Кўриб чиқилаётган даврда онлайн-аукцион орқали 5,7 миллиард сўмга 1672 дона автомобил рақамлари сотилди. Рақобат савдолари натижасида тугалланган битимларнинг 4,8% юқори даражадаги авторақамларга тўғри келди; 2-тоифадаги битимларнинг 9,4%; 3-тоифа учун 10,6%; 4-тоифа учун 13,3%; 5-тоифа учун 19,6%; шунингдек, 6-тоифали автомобил рақамлари учун 42,2%.

Биржа савдоси

Ҳисобот даврида очиқ биржа савдоларида 2169,8 миллиард сўмлик товар ресурслари сотилди. Сотувчи корхоналар тасдиқланган жадвалларга мувофиқ товарларни биржа аукционларига қўяди, шу жумладан:

Ун

5—11-сентабр кунлари биржа ун бозорида нархларнинг пасайиши кузатилди. Ўтган ҳафта давомида 66667,0 тонна ун сотувга қўйилган бўлиб, шундан 27255,0 тоннаси ёки 41% сотилган. Биржа савдоларида ҳар куни ўртача 1460 нафар харидор иштирок этди.

Кўриб чиқилаётган даврда 1-навли уннинг ўртача кунлик нархи бир тонна учун 4819,4 минг сўмдан 4807,0 минг сўмгача пасайган. Ун сотишнинг кунлик ҳажми ўртача 5451,0 тоннани ташкил этди.

Биржа савдолари натижасида 1-навли уннинг бир ҳафталик ўртача ўртача нархи бир тонна учун 4 750,7 минг сўмни ташкил этди.

Шакар

Биржа бозорида шакар нархининг пасайиши қайд этилди. Ўтган ҳафта давомида 12503,0 тонна шакар сотувга қўйилган бўлиб, шундан 11052,0 тоннаси ёки 88,4% сотилган. Биржа савдоларида кунига ўртача 475 нафар харидор иштирок этди.

Кўриб чиқилаётган даврда барча тоифадаги шакарнинг ўртача кунлик нархи бир тонна учун 12366,5 минг сўмдан 11946,9 минг сўмга ёки 3,4 фоизга пасайган. Биржа савдолари натижасида ТС-2 тоифали маҳаллий шакарнинг ҳафталик ўртача нархи бир тонна учун 12 412,7 минг сўмни ташкил этди.

Полиетилен

Ўтган ҳафта давомида 3891,0 тонна полиетилен сотувга чиқарилиб, шундан 3791,0 тоннаси ёки 97,4% сотилган. Полиетиленнинг кунлик сотилиш ҳажми ўртача 758,0 тоннани ташкил этди.

Кўриб чиқилаётган даврда барча турдаги полиетиленнинг ўртача кунлик нархи бир тонна учун 21272,8 минг сўмдан 14778,0 минг сўмга ёки 30,5% га пасайган. Биржа савдоларида ҳар куни ўртача 87 нафар харидор иштирок этди.