Олий Мажлис Қонунчилик палатасининг навбатдаги мажлисида тадбиркорларнинг экспорт фаолиятини қўллаб-қувватлаш мақсадида «Валютани тартибга солиш тўғрисида»ги Ўзбекистон Республикаси Қонунига ўзгартишлар киритишни таклиф этувчи қонун лойиҳаси биринчи ўқишда кўриб чиқилди.
Кейинги йилларда экспортни қўллаб-қувватлаш, маҳаллий корхоналарни етакчи экспортёрга айлантириш борасида тизимли ишлар амалга оширилмоқда.
Шу билан бирга, бугунги кунда 612 та экспорт қилувчи корхоналар мавжуд бўлиб, уларнинг 9,7 миллион АҚШ доллари миқдоридаги муддати ўтган дебиторлик қарзлари билан экспорт шартномалари тузилган бўлиб, бу жўнатилган экспорт маҳсулоти умумий қийматининг (1 054,6 миллион АҚШ доллари) 5 фоизидан ошмайди.
Бу корхоналар амалдаги тартиб бўйича олдиндан тўловсиз экспорт қилиш имкониятидан фойдалана олмайди. Янги қонун лойиҳасида бир экспорт шартномаси бўйича маҳсулот ҳажмининг 5 фоизидан ортиқ бўлмаган дебиторлик қарзлари учун жарималарни бекор қилиш таклиф этилмоқда, бу эса тадбиркорларнинг экспорт фаолиятида қўшимча ёрдам кўрсатиши ва маҳаллий маҳсулотларнинг жаҳон бозорида рақобатбардошлигини ошириши лозим.
Таъкидлаш жоизки, экспортга жўнатилган маҳсулот таннархининг 5 фоизигача бўлган жарима миқдори корхоналарнинг ихтиёрида.
Муҳокамалар чоғида депутатлар ҳужжатни янада такомиллаштириш бўйича қатор таклифлар билдирди.
Йиғилишда мутасаддилар қонун лойиҳаси юзасидан кўплаб саволларга атрофлича жавоб олдилар, сўнгра депутатлар томонидан қабул қилинди.