Ўзбекистон энергетика вазири Жўрабек Мирзамахмудов ва Япониянинг Ўзбекистондаги Фавқулодда ва мухтор элчиси Такаши Хатори ўртасида учрашув бўлиб ўтди.
Ўзбекистон ва Япония ўртасидаги стратегик шериклик ва энергетика соҳасидаги кўп томонлама ҳамкорликни янада ривожлантириш масалалари муҳокама қилинди.
Томонлар Ўзбекистон Республикаси Президентининг 2019-йил декабр ойида Японияга ташрифи чоғида эришилган барча келишувларни амалга оширишни жадаллаштириш зарурлигини таъкидладилар.
Йиғилишда янги ишлаб чиқариш қувватларини кафолатли электр энергияси билан таъминлаш, электр энергетика объектларини модернизация қилиш бўйича замонавий технологияларни жорий этиш ҳамда истеъмолчиларни электр ва иссиқлик энергияси билан таъминлашни яхшилаш бўйича қатор лойиҳалар кўриб чиқилди.
Бош пудратчи «Mitsubishi Corporation Mitsubishi Power Ltd.»консорсиуми томонидан тақдим этилган «Навоий ИЭСда қуввати 650 мВт бўлган учинчи комбинатли электр станциясини қуриш» (Навоий-3) инвестиция лойиҳасига алоҳида эътибор қаратилди.
Фото: Ўзбекистон ва Япония ўртасидаги стратегик шериклик ва энергетика соҳасидаги кўп томонлама ҳамкорликни янада ривожлантириш масалалари муҳокама қилинди.
Такаши Ҳатори, шунингдек, Япониянинг «Sumitomo», «Isuzu», «Mitsui» каби йирик компаниялари Ўзбекистон билан савдо-иқтисодий алоқаларни ривожлантириш ва икки давлат ўртасидаги муносабатларни жадаллаштиришдан манфаатдор эканини таъкидлади.
Энергетика вазири Ж.Мирзамаҳмудов Ўзбекистон билан Япония ўртасида ҳамкорликни янада ривожлантириш учун улкан салоҳият мавжудлиги ва бу йўналишда барча саъй-ҳаракатларни амалга оширишга тайёр эканини таъкидлади.
Учрашув икки давлат ўртасида энергетика соҳасида ҳамкорликни ривожлантириш зарурлиги тўғрисида умумий тушунча билан якунланди.