Ўзбекистонда чет эл валютасини олиб кириш ва олиб чиқишнинг янги қоидалари кўриб чиқилмоқда

Вазирлар Маҳкамасининг «Ҳукуматнинг айрим қарорларига ўзгартиш ва қўшимчалар киритиш тўғрисида»ги қарори лойиҳаси жамоатчилик муҳокамасига қўйилди.

Жисмоний шахслар томонидан олиб кирилаётган ва олиб чиқилаётган 70 000 000 (етмиш миллион) сўмдан ортиқ эквивалентдаги пул маблағлари бўйича божхона назоратини ўтказиш тартиби йўловчи божхона декларациясини тўлдириш ва божхона органи ходимига тақдим этиш йўли билан белгиланади.

Мазкур низомга таклиф этилаётган ўзгартиришда декларация қилинадиган сумма 100 000 000 (юз миллион) сўмдан ортиқ қилиб белгиланган.

Жисмоний шахслар декларацияни тўлдириш учун зарур бўлган белгиланган миқдордан ортиқ декларация қилинмаган нақд пул маблағларини тақдим этган тақдирда, божхона органларининг мансабдор шахслари томонидан жисмоний шахсларга декларацияни тўлдириш қоидаларини тушунтириш тартиби жорий этилади.

Хабар берганимиздек, лойиҳанинг қабул қилиниши чет эл валютасини олиб кириш ва олиб чиқиш билан боғлиқ муносабатларни тартибга солиш, тадбиркорлик субъектларига қулайликлар яратиш, давлат бюджетини тежаш имконини беради.