АҚШ Давлат департаменти Россияни ўз қўшинларини Украина ва Қрим билан чегаралар бўйлаб ҳаракатлантиришдан тийилишга чақирди. Вашингтонга кўра, бу Донбассдаги можаронинг авж олишига олиб келиши мумкин.
Бу ҳақда АҚШ Давлат департаменти вакили айтиб ўтди.
Унга кўра, Вашингтон «Москва билан ўзаро муносабатларга очиқ», АҚШ эса Россия қўшинларининг Украина билан чегарада, шунингдек, Қримда ҳаракатланиши ҳақидаги хабарларни «ишончли» деб ҳисоблайди. «Биз Россияни эскалацияга олиб келиши мумкин бўлган ҳаракатлардан тийилишга чақирамиз», — деди АҚШ ТИВ вакили.
Аввалроқ Россия Федерацияси Президенти матбуот котиби Дмитрий Песковнинг таъкидлашича, Кремл Украина томони Украинанинг жануби-шарқида фуқаролик уруши хавфини келтириб чиқарадиган провокацион ҳаракатлар қилиши мумкинлигидан хавотир билдирмоқда. Унга кўра, Украина расмийлари Минск келишувлари бўйича ўз мажбуриятларини бажармайдилар, бу эса вазиятни мураккаблаштиради ва уни янада кескинлаштиради. Шунингдек, у Россия армиясининг Россия ҳудуди бўйлаб ҳаракатланиши бошқа давлатларни ташвишга солмаслиги кераклигини таъкидлади, чунки Россия Федерацияси бошқа давлатларга, шу жумладан, Украинага таҳдид солмайди. 31 март куни Россия Федерациясининг Украинанинг шарқидаги можарони ҳал қилиш бўйича алоқа гуруҳидаги ваколатли вакили Борис Гризлов Киевнинг Донбассдаги можаро зонасида хавфсизлик масалалари бўйича позициясини масъулиятсиз ва жирканч деб атади.
