Байден Украина бўйича йиғилиш ўтказди

АҚШ президенти Джо Байден 22-январ, шанба куни хавфсизлик бўйича маслаҳатчилари билан музокаралар ўтказди. Украина атрофидаги вазият ва Россия Федерацияси билан мулоқот бўйича саволлар кўриб чиқилди.

Бу ҳақда Оқ уй матбуот хизмати хабар берди.

АҚШ раҳбари матбуот котиби Джен Псакининг маълум қилишича, учрашув Мериленд штатидаги Кемп Девиддаги президент қароргоҳида бўлиб ўтган.

“Бугун президент Байден Кемп Девидда шахсан ва виртуал равишда ўзининг миллий хавфсизлик жамоаси билан учрашиб, Россиянинг Украинага қарши давом этаётган тажовузкор ҳаракатларини муҳокама қилди”, — дейилади баёнотда.

Шу тариқа, маслаҳатчилар давлат раҳбарига Россиянинг Украина билан чегарасида олиб борилаётган ҳарбий амалиётларининг бугунги ҳолати ҳақида ҳисобот берди. Шундан сўнг, йиғилиш иштирокчилари “вазиятни дипломатия йули билан юмшатиш бўйича олиб борилаётган саъй-ҳаракатлар, шунингдек, иттифоқчилар ва ҳамкорлар томонидан яқиндан мувофиқлаштирилаётган бир қатор жиловлаш чоралари, жумладан, Украинага хавфсизлик бўйича доимий ёрдам етказилишини” муҳокама қилишди.