Россиянинг Украинага ҳужуми бошланганидан бери Берлинда украиналикларга қарши 3250 жиноят қайд этилган. Бундай маълумотларни бир кун аввал Украина ташкилотлари алянси эълон қилган эди.
Ташкилот сўровига кўра, Берлин палатасининг Яшиллар партиясидан аъзоси Кетрин Вален 2022-йил 24-февралдан бери Германия пойтахтида украиналикларга қарши уюштирилган ҳужумлар юзасидан суриштирув ўтказди.
Полиция статистикаси шуни кўрсатадики, украиналикларга нисбатан тан жароҳатлари билан ҳужумлар бошқа гуруҳларга нисбатан икки ярим баравар кўп.
Жиноятларнинг юқори сони, айниқса, Митте (640) ва Шарлоттенбург-Вильмерсдорф (484) туманларида. Бошқа ҳудудларда улар анча кам . Айниқса, ўғирлик (1294), баданга шикаст етказиш (704), фирибгарлик (301), таҳдид (234) ва ҳақорат (117) ҳолатлари кўп бўлган. Фақат 23 та тергов суди айблов билан якунланган.
Шу билан бирга, полиция ушбу ҳужумларнинг сиёсий мотивлари бор-йўқлиги ҳақида маълумот бермади, гарчи уларда бу маълумотлар бўлиши мумкин.
«Биз буни билмаймиз, аммо гап нафратга бўлган жиноятлар ҳақида кетяпти, дейишга асос бор», деди алянс вакиллари.
Аввалроқ Германияда Украинадан келган қочқинлар учун ётоқхона ёниб кетган эди. Ётоқхонага жойлаштирилган 14 кишининг барчаси ўз вақтида бинони тарк этишга муваффақ бўлган ва жабрланмаган. Расмийлар ва полиция ёнғин атайлаб қўйилган деб ҳисобламоқда.