Германия Бундестаги Шветсия ва Финляндиянинг НАТОга аъзо бўлиш ҳақидаги аризаларини кўпчилик овоз билан маъқуллади.
“Бундестаг ёзги таътил олдидаги сўнгги йиғилишида Финляндия ва Шветсиянинг НАТОга киришини кўпчилик овоз билан маъқуллади”, деб ёзади Bild.
Аввалроқ, Скандинавия давлатларининг аризалари Алянснинг бир қанча аъзолари, жумладан, Канада, Полша, Дания ва Норвегия томонидан маъқулланган.
5 июл куни Шветсия ва Финляндиянинг НАТОга аъзо бўлишини ратификация қилиш жараёни бошланди.
Финляндия ва Швеция НАТОга аъзо бўлиш баённомалари алянсга аъзо барча давлатлар томонидан ратификация қилинганидан кейин расман аъзо бўлади. Алянс бош котиби Йенс Столтенбергнинг қайд этишича, жараён бир неча ой давом этиши мумкин.
Финляндия ва Швеция 18 май куни алянсга кириш учун ариза топширган. Аризаларни муҳокама қилиш Туркия томонидан блокланган, бироқ кейинчалик эътирозларини қайтариб олган. 29-июн куни НАТО раҳбарияти давлатларни алянсга киришга таклиф қилишга қарор қилди.