Европа Кенгаши Парламент Ассамблеяси (ЕКПА) президенти Тини Кокс Россия раҳбариятини бугунги кунда Украина фуқаролик инфратузилмасига қилинган ракета ҳужумлари оқибатлари ҳақида огоҳлантирди. Бу ҳақда у 23-ноябрь куни Twitter да ёзган.
Кокснинг сўзларига кўра, Россиянинг фуқаролик инфратузилмасига (жумладан, Волнянскдаги туғруқхона ва Купянскдаги поликлиникага) ракета ҳужумлари халқаро ҳуқуқ нормаларини бузишда давом этмоқда.
«Кремльдаги етакчилар, эҳтиёт бўлинглар – бу жиноятлар жазосиз қолмайди», – деди ЕКПА президенти.
Эслатиб ўтамиз, Украина президенти Владимир Зеленский бугун БМТ Хавфсизлик кенгашининг Украина ва Молдовада электр таъминотидаги узилишларга олиб келган босқинчиларнинг ракета зарбаларига бағишланган фавқулодда йиғилишида нутқ сўзлайди.