Европа Иттифоқи Португалиядан Марказий Европага газ қувурини қуради

Европа Иттифоқи Португалия ва Испанияни марказий Европа билан боғлайдиган янги газ қувури қурилишини муҳокама қилмоқда. Испания ва Франция ўртасидаги қисм 9 ойда қурилиши мумкин. Бу ҳақда Financial Times хабар бермоқда.

Испания энергетика ва атроф-муҳит вазири Тереза Риберанинг айтишича, Европани Россия газидан ажратиш ҳаракатлари доирасида Испаниядан Францияга қувур линиясининг бир қисми бир йилдан камроқ вақт ичида қурилиши мумкин.

Аввалроқ Германия канцлери Олаф Шольц 11-август, пайшанба куни Испания, Португалия ва Франция раҳбарлари ҳамда Еврокомиссия раҳбари Урсула фон дер Лейен билан янги қувур лойиҳасини муҳокама қилганини маълум қилганди. Унинг қўшимча қилишича, «Шимолий Африка ва Европа ўртасидаги бошқа алоқалар ҳам бизга энергия таъминотини диверсификация қилишда ёрдам бериш учун яратилади».

Португалия бош вазири Антинио Костанинг қўшимча қилишича, Германия Португалиянинг газ қувурини қуриш бўйича мажбуриятига 100 фоиз ишониши мумкин. Янги газ қувури қуриб битказилгунга қадар, Коста Португалиянинг жануби-ғарбий соҳилидаги Синес портидан Европага суюқ табиий газ олиб келиш учун логистика маркази сифатида фойдаланиш мумкинлигини айтди.

Қайд этилишича, лойиҳа аллақачон ишлаб чиқилган. У 2019 йилда француз қаршиликлари туфайли қолдирилди.