Финляндия НАТО иттифоқчилари билан машғулотларга мезбонлик қилмоқда

Финляндияда АҚШ ва Британия қуролли кучлари иштирокида ҳарбий машғулотлар ўтказилди, деб хабар қилди Буюк Британия Мудофаа вазирлиги 30-июл куни.

Тўрт кунлик машғулотларда уч давлатдан 750 нафар ҳарбий хизматчи иштирок этди. Машқлар НАТО давлатлари Финляндияни алянсга киритиш тўғрисидаги протоколни имзолаганидан бир неча ҳафта ўтиб бўлиб ўтди.

Буюк Британия Мудофаа вазири ўринбосари Жеймс Хиппининг айтишича, машғулотлар «қуролли кучларимиз АҚШ ва Финляндия иттифоқчилари билан куч ва ўзаро ҳамкорлигини намойиш этди».

Унинг сўзларига кўра, машғулотлар Буюк Британиянинг Болтиқбўйи мамлакатлари ҳимояси ва хавфсизлигини таъминлашга содиқлигини кўрсатишга ҳам мўлжалланган.

Замонавий тарих давомида бетараф мақомни сақлаб келган Финляндия ва Швеция Россиянинг Украинага кенг кўламли босқинидан сўнг Натога аъзо бўлишга қарор қилди. Кремл бу қарорга қарши чиқди. Финляндия ва Швеция Натога қўшилгандан сўнг, Россиянинг алянс билан чегараси бирданига икки баравар кўпаяди.