Қўшма Штатлар Индонезиядаги саммит якунида G20 давлатлари Россиянинг Украинага қарши урушини ва унинг жаҳон иқтисодиётига ҳалокатли таъсирини қоралашини кутмоқда.
Бу ҳақда Financial Times манбаларига таяниб хабар бермоқда.
Қайд этилишича, G20 давлатларининг аксарият вакиллари сўнгги кунларда йиғилиб, Россиянинг Украинага қарши урушини энг кескин тарзда қоралаш керак деган фикрга келишган.
Манба қоралаш қандай шаклда бўлишини айтишдан бош тортди.
«Мен якуний музокаралар олдидан олдинда бўлмайман, бироқ G20 Россия уруши халқ ва бутун жаҳон иқтисодиётига вайронагарчилик келтираётганини аниқ кўрсатиб беради», — деди исмини ошкор қилмаслик шарти билан у.
Унинг сўзларига кўра, G20 давлатларининг аксарияти Украинадаги уруш иқтисодий қийинчилик ва беқарорликни келтириб чиқарганига рози, бу дунёнинг кўплаб мамлакатларида кузатилмоқда.
Нашр томонидан кўрилган коммунике ҳужжати лойиҳасида айтилишича, «аъзоларнинг аксарияти Украинадаги урушни кескин қоралаб, бу уруш инсониятга катта азоб-уқубатлар келтираётганини ва жаҳон иқтисодиётидаги мавжуд муаммоларни янада кучайтираётганини таъкидлади».
Эслатиб ўтамиз, бугун Балида G20 саммити бошланди. Унинг иштирокчилари «ҳозирги долзарб глобал муаммолар, шунингдек, глобал барқарор ва инклюзив ўсиш учун COVID-19 дан кейинги иқтисодий ва соғлиқни сақлаш саъй-ҳаракатларини» муҳокама қиладилар.
Шунингдек, Россия президенти Влалимир Путин G20 саммитида онлайн иштирок этишдан бош тортгани хабар қилинганди. Кремльнинг тушунтиришича, бундай қарор гўёки унинг жадвали туфайли қабул қилинган. Учрашувда Россиядан ташқи ишлар вазири Сергей Лавров иштирок этмоқда.