Эрдўғон Путин билан «дон келишуви» ва Суриядаги вазиятни муҳокама қилди

Туркия президенти Ражаб Тойиб Эрдўғон ва Россия президенти Владимир Путин 11-декабр куни телефон орқали мулоқот қилиб, «дон келишуви», шунингдек, Сурия шимолидаги уруш ва вазиятни муҳокама қилди. Бу ҳақда Туркия президенти девонига таяниб, «Anadolu» хабар бермоқда.

Қайд этилишича, Эрдўғон суҳбат чоғида Анқара ва Москва «ғалла йўлаги» орқали аллақачон келишилган маҳсулотлардан ташқари қўшимча турдаги маҳсулотларни экспорт қилишни муҳокама қилишлари мумкинлигини айтган. У, шунингдек, Путинга Россия ва Украина ўртасидаги уруш «имкон қадар тезроқ тугатилиши» истагини билдирди.

Бундан ташқари, томонлар энергетика соҳасидаги икки томонлама муносабатлар ва Сурия шимолидаги вазиятни муҳокама қилди.

Эрдўғоннинг сўзларига кўра, унинг учун Сочи-2019 даги келишувларга мувофиқ Туркия билан чегарага яқин 30 километрлик ҳудудда курд PKK/YPG фаолиятини тўхтатиш муҳим.

Кремл сайтида таъкидланганидек, суҳбат чоғида Эрдўғон ва Путин «Туркияда минтақавий газ хабини яратиш ташаббуси юзасидан фикр алмашишни» давом эттирган.

Эслатиб ўтамиз, Эрдўғон Путин билан суҳбатдан сўнг Украина президенти Владимир Зеленскийга қўнғироқ қилган. Улар келгусидаги ишлар ва «ғалла йўлаги»ни кенгайтириш имкониятларини муҳокама қилдилар.