«Pandora Papers»: Чили президентига импичмент эълон қилинди

Чили президенти Себастян Пинера Сенатда «Pandora Papers» (Пандора ҳужжатлари) бўйича суддан сўнг импичмент эълон қилинди.

Бунинг учун 9-ноябр, сешанба куни мамлакат Конгресс қуйи палатаси депутатларининг аксарияти овоз берди, деб ёзади Associated Press.

Сенатнинг 20 соатлик марафон сессиясидан сўнг импичмент бўйича овоз бериш 155 аъзодан иборат Депутатлар палатасида зарур бўлган камида 78 овозни тўплади. 67 депутат импичментга қарши овоз берди, жумладан бир қанча мухолифат вакиллари. Бошқалар эса бетараф қолди ёки қатнашмади.

Импичмент учун зарур бўлган кўпчиликни олиш учун социалист депутат Хайме Наранхо 14 соат давомида тергов ҳақидаги бир қатор ҳужжатларни ўқиб чиқди.

Чили президентлик вазири Хуан Хосе Осса импичментни «сиёсий шоу» деб атади.

«Pandora Papers»: Чили президенти Себастян Пинера нимани яширган эди

Айбловлар бутун дунёдаги таниқли шахслар, жумладан, Чилидаги энг бадавлат кишилардан бири Пинеранинг офшордаги молиявий операцияларини очиб берувчи «Pandora Papers»ни нашр этиш билан боғлиқ.

Нашр қилинган ҳужжатлар Пинеранинг ўғилларидан бири унинг оиласи билан биргаликда эгалик қилган Доминга кон лойиҳасини сотиш учун Британия Виржиния оролларидаги оффшор компаниялардан фойдаланганини кўрсатди.

2011 йилда конни сотиш учун якуний тўлов ҳукуматнинг унинг Чили шимоли-марказидаги жойлашувини қўриқхона деб эълон қилишдан бош тортганига боғлиқ эди. Ўша пайтда Пинера бошчилигидаги ҳукумат, экологларнинг чақириқларига қарамай, буни қилмади. Аммо кейинги ҳукуматлар ҳам буни қилмади.

Бир неча йил ўтгач, терговчилар ишни ўрганиб чиқишганида, Пинера у компанияларни бошқаришда иштирок этмаслигини ва ҳатто Доминга билан алоқаси ҳақида ҳам хабари йуқлигини айтди.