Пентагон Украина талаб қилган ракеталарни ишлаб чиқаришни тезлаштиради

АҚШ Мудофаа вазирлиги Украинага жўнатилиши туфайли тугаб қолган заҳираларни тўлдириш учун Stinger зенит-ракеталари ва танкга қарши «Javelin» ракеталарини ишлаб чиқаришни тезлаштиришни режалаштирмоқда.

Бу ҳақда CNN мудофаа вазирлиги вакилларига таяниб ёзмоқда.

Украина АҚШдан ҳар куни 500 та Javelin танкга қарши ракета ва 500 та Stinger зенит-ракеталарини олмоқчи.

7-мартга қадар АҚШ ва НАТОнинг бошқа аъзолари Украинага 17 мингга яқин танкга қарши ракета ва 2000 та зенит ракеталарини жўнатган эди. Ўшандан бери бу рақам ошди, аммо қанчага эълон қилинмади.

16 март куни Оқ уй 800 миллион долларлик ёрдам пакетини эълон қилди. Пакетга 800 та қўшимча Stinger зенит тизими ва икки мингта танкга қарши «Javelin» ракета мажмуаси киритилган.

Stinger ишлаб чиқариш линияси чет элда сотиш буюртмасини бажариш учун қайта ишга туширилди. Ишлаб чиқариш қувватларини ошириш ва ишлаб чиқариш вақтини қисқартириш вариантлари кўриб чиқилмоқда.

Javelin ишлаб чиқарувчи Lockheed Martin “яқин келажак учун ортиб бораётган талабни қондириш имкониятига эга», деди компания.