ПККга аъзоликда айбланган биринчи маҳкум Туркияга топширилди

Швеция ҳукумати Туркия ҳукумати террорчи ташкилот деб ҳисоблаган Курдистон ишчилар партияси (ПКК) аъзолигида айбланган биринчи шахсни Туркияга топширди.

Бу ҳақда Anadolu агентлиги хабар бермоқда. Шундай қилиб, Швеция Туркиянинг Натога киришига розилигини олиб, ўзи берган мажбуриятларни бажаришга киришди.

Гап Маҳмут Татни экстрадиция қилиш ҳақида кетмоқда. У Туркияда террорчилик фаолияти учун олти йилу ўн ойга қамалган. Туркия расмийларига кўра, Маҳмут Тата Тунжели шаҳридаги Курдистон ишчилар партияси ишида иштирок этган, деб ёзади Hurriyet. 2015-йилда у мамлакатни тарк этиб, Швециядан бошпана сўраган, бироқ рад этилган. Кеча, 2 декабр куни кечқурун эркак Истанбулга олиб кетилган, шундан сўнг у тергов изоляторига жўнатилган.

Маҳмут Тат 22 ноябр куни қўлга олинган. Дувар газетасининг ёзишича, ҳибсга олинган куни унга яқинлари билан боғланишга рухсат берилмаган. Кейинроқ у Швецияда яшовчи ўғли Озан билан боғланиб, Туркияга экстрадиция қилингани ва Истанбул аэропортидаги полиция бўлимида сақланаётганини айтди.

18 май куни Финляндия ва Швеция Натога ариза беришди. Туркия мамлакатларнинг иттифоққа киришига қарши чиқди. Туркия президенти Ражаб Тойиб Эрдўғон бу позициясини Швеция ва Финляндиянинг ПККга нисбатан содиқ муносабати билан изоҳлади.

28-июн куни Туркия Швеция ва Финляндиянинг ПКК аъзоларини унга топшириш шарти билан Натога киришига рози бўлди. Июл ойида курдлар икки Скандинавия давлатида Туркия билан иттифоққа қўшилиш имконини берувчи келишувга қарши чиқишди.