Европа Иттифоқи россияликлар учун визалар беришни мураккаблаштиришга тайёрланмоқда

Европа Иттифоқи ташқи ишлар вазирлари келаси ҳафта Прагада бўлиб ўтадиган норасмий учрашувда Россия билан виза тартибини соддалаштириш бўйича келишувнинг тўхтатилишини қўллаб-қувватлашга тайёрланмоқда, бу эса россияликларнинг Европа Иттифоқи мамлакатларига саёҳат қилиш имкониятини чеклайди, деб ёзади Financial Times музокарачиларнинг уч иштирокчисига таяниб.

«Россиялик сайёҳларнинг бизнинг шаҳарларимиз ва қирғоқларимиз бўйлаб сайр қилишига йўл қўйиб бўлмайди. Биз рус халқига бу уруш оддий эмас, бу қабул қилиб бўлмайдиган иш эканлиги ҳақида сигнал беришимиз керак», — дея FT Европа Иттифоқининг юқори мартабали мулозимидан иқтибос келтирган.

Нашрнинг яна бир манбасининг қайд этишича, Брюссел «визани соддалаштиришни чеклашдан тўхтамасликка» интилмоқда ва йил охиригача бу йўналишда қўшимча чоралар кўриши мумкин.

Еслатиб ўтамиз, Чехия ва Полша каби баъзи давлатлар Россия Федерациясининг агрессиясига жавобан россияликларга визалар беришни мустақил равишда тўхтатдилар. Сўнгги ҳафталарда Европа Иттифоқи бундай қарорни блок даражасида қабул қилиш керакми ёки йўқлигини муҳокама қилмоқда.

Болтиқбўйи давлатлари, Полша ва Финляндия Европа Иттифоқидаги Россия фуқароларига визалар беришни тўлиқ тўхтатиш тарафдори. Германия, жанубий Европанинг туризмга қарам давлатлари ва Европа Иттифоқининг етакчи дипломати Хосеп Боррел бундай ҳаракатга қарши чиқди.