Шавкат Мирзиёев 23-феврал куни ёшлар бандлигини таъминлаш масалаларига бағишланган йиғилиш ўтказди, унда аҳоли бандлигини таъминлаш, ёшларни замонавий касб-ҳунарга ўргатиш, тадбиркорлик фаолиятига кенг жалб этиш масалалари муҳокама қилинди. Жорий йилда 925 минг ўғил-қизни иш билан таъминлаш зарур. Оилавий тадбиркорлик дастури доирасида ажратилаётган кредитларнинг камида 40 фоизи ёшлар бизнесини ривожлантиришга йўналтирилади. «Ёш тадбиркор» номинацияси бўйича танловлар ўтказилиб, энг яхши бизнес ғоялари билан ғолиблар малака ошириш учун хорижга жўнаб кетади.
Шунингдек, ахборот технологиялари соҳасида 70 минг ёш мутахассисни иш билан таъминлаш мақсадида «Ҳар бир микрораёндан иккита дастурчи» лойиҳасини амалга ошириш режалаштирилган.
«Ибрат фарзандлари» лойиҳаси орқали 1 миллион бола бепул чет тилларини ўргатадилар. Мактабларда ўқув жараёнида фойдаланилмаётган бинолар чет тили ўқитувчилари ва ўқув марказлари томонидан бепул фойдаланишга берилади.
Хусусий курсларда таҳсил олаётган ва C1 даражадаги сертификат олган ёшларга ўқиш харажатлари, немис, француз, корейс, япон ва хитой тилларида B2 даражасидаги сертификат олиш учун эса харажатлари қопланади.
«Устоз» лойиҳаси доирасида 250 минг ёш маркетинг, реклама, электрон тижорат, IT-дизайн каби 30 та замонавий касб-ҳунар бўйича таълим олади.
Кейинги йилларда аҳолига деҳқончилик учун 200 минг гектар ер ажратилди. Жорий йилда яна 60 минг 500 гектар ердан ёшларга ажратиш режалаштирилган.
Ёш фермерлар «Агробанк» фермерлар мактабида ўқитилиб, «Ёшлар дафтарчаси» ва «Фермерлар» жамғармаси ҳисобидан мини жиҳозлар, уруғлик ва кўчат материаллари харид қилиш учун субсидиялар олади. Шунингдек, улар экспортчилар ва қайта ишловчилар билан ҳамкорлик қиладилар. Мева-сабзавотчилик кооперативларини 2 миллиард сўмгача молиялаштириш кўзда тутилган.