Молдовада рус янгиликлари тақиқланган

Молдова ҳукумати Россия янгиликларини телевидениеда кўрсатишни тақиқлади.

Президент Майя Санду ахборот хавфсизлиги тўғрисидаги қонунни имзолади, деди бир кун аввал Rlive телеканалида Телевидение ва радио бўйича кенгаш раҳбари Лилиану Вицу.

Маълумки, ушбу қонун кейинги ҳафтадан кучга киради. Ҳужжат Молдова телеканалларига Россия янгиликлари ва таҳлилий дастурларини, шунингдек, Россия ҳарбий филмларини кўрсатишни тақиқлайди.

Ҳужжатда ахборот хавфсизлигига таҳдид соладиган «дезинформация» тушунчаси ҳам белгилаб берилган. Гап «ҳарбий тажовуз, гибрид тажовуз, терроризм, диктаторлик тузумларини оқлайдиган ёки тарғиб қилувчи» маълумотлар ҳақида бормоқда.

Дезинформация тарқатганлик учун 40 дан 100 минг лейгача (2 дан 5 минг еврогача) жарима, шунингдек, эшиттириш лицензиясини етти кунгача тўхтатиб туриш назарда тутилган. Телерадиокомпания кенгаши қонун ижросини назорат қилади.

Эслатиб ўтамиз, 18 июн куни Кишинёвда Руминия ва Молдова парламентларининг биринчи қўшма мажлиси бўлиб ўтган эди. Молдова мухолифатдаги коммунистлар ва социалистлар блоки унда иштирок этишдан бош тортди.