Сербия Украина шаҳарларини реконструкция қилишда иштирок этади

Александр Вучич Украина элчиси билан учрашувда Сербия урушдан кейин Украина шаҳарларини тиклашга ёрдам беришини айтди.

Бу ҳақда РЦ телерадиокомпанияси хабар берди.

Хабар қилинишича, элчи билан учрашувда Вучич Украинадаги вазиятдан афсусда эканини билдириб, уни Сербия ҳукумати ва Миллий хавфсизлик кенгаши позициялари билан таништирган.

У Сербия Бирлашган Миллатлар Ташкилоти Низомида мавжуд халқаро ҳуқуқнинг асосий тамойилларидан бири сифатида давлатларнинг ҳудудий яхлитлиги ва суверенитети тамойилларини ҳурмат қилишга интилиши ва шу маънода Украинанинг ҳудудий яхлитлигини ҳурмат қилишини таъкидлади.

Вучич Украинага Сербиянинг ҳудудий яхлитлигини ҳурмат қилгани учун миннатдорчилик билдирди.

Унинг таъкидлашича, Сербия Украинадан келган қочқинлар учун энг яхши шароитларни, шунингдек, Европа Иттифоқи қоидаларига мувофиқ яшаш ва ишлаш учун барча рухсатномаларни тақдим этган.

«Александар Вучич Сербия Украинадаги шаҳарларни реконструкция қилишда иштирок этишини маълум қилди. У Сербия ва Украина ўзаро манфаатли бўлган турли соҳаларда ҳамкорликни ривожлантириш имкониятига эга эканлигини таъкидлади ва қисқа вақт ичида иқтисодий алоқаларни мустаҳкамлаш устида ишлашни давом эттириш зарурлигини таъкидлади.», — дейилади хабарда.

Вучич Сербия ўзининг изчил сиёсатига мувофиқ келишмовчиликларни тинч йўл билан ҳал этиш тарафдори эканлигини ва шу маънода музокаралар ўтказиш йўлидаги барча саъй-ҳаракатларни қўллаб-қувватлашини яна бир бор таъкидлади.