Ўзбекистон ва Хитой икки давлат ўртасида мунтазам қатновлар частотасини оширишга интилмоқда, деб хабар қилди Транспорт вазирлиги матбуот хизмати.
Транспорт вазирлиги, Фуқаро авиацияси агентлиги ва «Ўзаэронавигация» маркази вакиллари Хитой авиация маъмурияти делегацияси билан учрашиб, ҳаво қатновини кенгайтириш имкониятларини муҳокама қилди.
Музокараларда Ўзбекистон ва Хитой ўртасида янги ҳаво йўналишларини, жумладан, Самарқанддан Урумчига ва Тошкентдан Шанхай, Хайнан, Санью ва Ханчжоуга мунтазам қатновларни қўшишга қарор қилинди.
Фото: Ўзбекистон ва Хитой ўртасида авиақатновларни кўпайтириш режалари эълон қилинди
Ушбу чора-тадбирлар парвозлар географиясини кенгайтириш ва мамлакатлар ўртасидаги ҳаво қатновининг умумий ҳажмини оширишга қаратилган.
Шунингдек, Хитой авиакомпанияларини Ўзбекистон бозорига жалб қилиш имкониятлари, жумладан, ўтган йили Хитойда ташкил этилган янги компаниялар ҳам муҳокама қилинди.
Музокаралар чоғида «Qanot Sharq» ва «Centrum Air» каби Ўзбекистон авиакомпанияларини Хитой авиация идоралари талабларига мувофиқ Хитойга мунтазам рейсларни амалга ошириш учун сертификатлаш масалалари ҳам кўриб чиқилди.
Бу қадамлар Ўзбекистон ва Хитой ўртасидаги ҳаво алоқаларини мустаҳкамлаш, туризм ва иқтисодий ҳамкорликни ривожлантиришга хизмат қилиши кутилмоқда.