Тошкент 2022-йилда карате бўйича Осиё чемпионатига мезбонлик қилади

Қозоғистонда бўлиб ўтган Осиё карате федерацияси конференциясида 2022-йилда карате бўйича Осиё чемпионатини ўтказиш жойи бўйича қарор қабул қилинди.

Ўзбекистон пойтахтида келаси йили карате бўйича Осиё чемпионати бўлиб ўтади, мусобақалар барча ёш тоифаларида бўлиб ўтади, деб хабар бермоқда Миллий олимпия қўмитаси (МОҚ) матбуот хизмати.

Бу ташаббус Осиё карате федерациясининг Олмаота шаҳрида бўлиб ўтган конференцияси доирасида кўриб чиқилди. Тадбирда Бутунжаҳон карате федерацияси президенти Антонио Эспиноза, шунингдек, Осиё карате федерацияси биринчи вице-президенти Алам Муллаевлар иштирок этишди.

«Кун тартибида навбатдаги қитъа чемпионатига мезбон давлатни аниқлаш масаласи кўриб чиқилди. Натижаларга кўра, Тошкент барча ёш тоифалари бўйича 2022 йилги Осиё чемпионатига мезбонлик қилади», — дейилади МОҚ хабарида.

Қайд этилишича, бошқа номзодлар ноқулай эпидемиологик вазият туфайли танловда қатнаша олмаган.

Тошкентда карате бўйича Осиё чемпионатининг аниқ санаси ҳозирча номаълум.
Аввалроқ, Тошкент 2019 йилнинг июл ойида катталар ўртасидаги Осиё чемпионатига мезбонлик қилган эди.