Ўзбекистон ҳукумати келаётган ёзда мамлакатда электр энергияси тақчиллигидан хавотирда.
Расмийларнинг ҳисоб-китобларига кўра, жорий йилда энергия тақчиллиги 3,4 миллиард киловатт-соатга, иссиқ кунларда эса кунлик эҳтиёж 255 миллион киловатт-соатга етиши мумкин.
Расмийлар бир қатор чора-тадбирларни амалга ошириш орқали энергия тақчиллиги муаммосини ҳал қилишни режалаштирмоқда.
Жорий йилда 2000 мегаватт қувватга эга қуёш ва шамол электр станциялари ишга туширилиши ана шундай чора-тадбирлардан биридир. Шунингдек, корхоналар, томлар ва ижтимоий объектларга қуввати 1,2 минг мегаватт бўлган қуёш батареяларини ўрнатиш режалаштирилган.
Ўзбекистон Президенти муқобил энергия манбаларидан фойдаланишни рағбатлантириш мақсадида «Яшил энергия» сертификатлари тизими жорий этилишини айтди.
1 июлдан ГЭСларга «яшил» сертификатлар берилади. Тизим 1 октябрдан қайта тикланадиган энергия манбаларидан ишлаб чиқариладиган барча электр энергиясига татбиқ этилади.
Тадбиркорлар ва аҳолини қўллаб-қувватлаш мақсадида барча савдо ва хизмат кўрсатиш корхоналарига қуёш батареялари ўрнатиш учун ажратилган кредитларнинг 4 фоизини тадбиркорликни қўллаб-қувватлаш жамғармаси маблағлари ҳисобидан қоплаш кўзда тутилган.
Шунингдек, аҳоли ва тадбиркорларга имтиёзли кредитлар ажратиш учун халқаро молия ташкилотларидан 100 миллион доллар жалб этиш кўзда тутилган.