Бугун, 4-май куни Президентнинг ички туризм хизматларини диверсификация қилиш бўйича қўшимча чора-тадбирлар тўғрисидаги қарори эълон қилинди.
Мазкур ҳужжат ҳукуматга Тошкент шаҳрини «минтақавий туризм маркази»га айлантириш тўғрисидаги қарор лойиҳасини ишлаб чиқиш ва Ўзбекистон Республикаси Президенти Администрациясига киритиш учун бир ой муддат беради.
Тошкентнинг туризм инфратузилмасини ривожлантириш йирик кўнгилочар ва сайёҳлик обектларини қуриш бўйича янги инвестиция лойиҳаларини ўз ичига олади. Яъни, пойтахтда янги аквапарклар, сафари боғлари, астрономия боғи ва гул боғи пайдо бўлади.
Шу билан бирга, йирик музейлар ва давлат сиркини реконструкция қилиш, музей архивларини тартибга солиш ва замонавий ахборот технологиялари асосида интерактив хизматларни жорий этиш ҳисобига пойтахтимизнинг туристик салоҳияти юксалади.
Ҳукумат, шунингдек, яқин икки йил ичида пойтахтимизда ўтказиладиган маданий-кўнгилочар тадбирлар ва фестиваллар, жумладан, халқаро тадбирларнинг календар режасини ишлаб чиқиш мажбуриятини олади.
Натижада Тошкент замонавий ва таниқли сайёҳлик брендига айланиши керак.