Ўзбекистон Республикаси Президенти ҳузуридаги Стратегик ислоҳотлар агентлиги Ўзбекистон автомобил саноатини ислоҳ қилиш ҳуқуқини олди.

Ўзбекистон Президенти ҳузуридаги Стратегик ислоҳотлар агентлигига иқтисодиётнинг давлат секторига жалб қилинган корхоналарни ислоҳ қилишни жадаллаштириш мақсадида автомобилсозлик саноатини бошқариш ваколати берилди.

«UzAssets» компаниясига автомобилсозлик саноати акцияларини бошқариш ҳамда корхоналарнинг ижроия органи ва кузатув кенгаши аъзоларини тайинлаш, шунингдек, уларнинг соф фойдасини тақсимлашда иштирок этиш вазифаси юклатилди. Бу янада самарали бошқарувни таъминлайди ва автомобилсозлик саноатини ислоҳ қилиш жараёнини тезлаштиради.

Ўзбекистонда автомобилсозликни ривожлантириш концепциясига мувофиқ, 2025-йилга қадар қатор вазифаларга эришиш белгиланган. Ишлаб чиқариш ҳажмини, экспортни кўпайтириш, маҳаллийлаштириш даражасини ошириш ва соҳада қўшимча иш ўринлари яратиш шулар жумласидандир.

Бу мақсадларга эришиш учун автомобиллар конструкциясини ўзгартириш, оммавий ишлаб чиқариш учун оргинал бутловчи қисмларни ишлаб чиқиш, автомобиллар модел ассортиментини янгилаш ва автомобилсозлик маҳсулотларининг маҳаллий техник стандартларини халқаро стандартлар даражасига кўтариш каби турли чора-тадбирлар ва механизмлардан фойдаланиш режалаштирилган.

Маҳаллийлаштириш даражасини чуқурлаштириш учун мамлакатимиз корхоналари негизида пўлат прокат, автомобил шиналари, қайта ишланган алюминийдан алюминий қисмлар ва бошқа материаллар ишлаб чиқаришни ўзлаштириш режалаштирилган.

Бундан ташқари, дунёнинг турли мамлакатларига, жумладан, Шарқий Европа, Жанубий Осиё, Яқин Шарқ ва Африка каби янги бозорларга автомобил экспортини кўпайтириш режалаштирилган.