Олий Мажлис Қонунчилик палатасининг сўнгги ялпи мажлисида «Ўзбекистон Республикаси Вазирлар Маҳкамаси тўғрисида»ги Конституциявий қонун лойиҳаси кўриб чиқилди.
9 боб ва 55 моддадан иборат ушбу қонун лойиҳасини депутатлар биринчи ўқишда ўрганиб чиқди ва бир қатор муҳим ўзгартиришларни назарда тутди.
Хусусан, Вазирлар Маҳкамасининг мақоми, унинг таркиби ва шакллантириш тартиби, шунингдек, Вазирлар Маҳкамаси Раёсати ва ваколатлари, фаолиятини ташкил этиш масалаларига оид моддаларга ўзгартиришлар киритиш таклиф этилди.
Янгиликларга кўра, Бош вазир ўз ўринбосарлари ва вазирлар билан биргаликда ҳар олти ойда бир марта Олий Мажлис Қонунчилик палатасига «Ўзбекистон – 2030» стратегияси ижроси тўғрисида ҳисобот тақдим этади.
Қонун лойиҳасида Конституциянинг янги таҳрири асосида ҳукуматнинг иқтисодиёт, бюджет, молия, солиқ, екология ва атроф-муҳитни муҳофаза қилиш соҳаларидаги ваколатлари ҳам кенгайтирилган.
Республика ижро этувчи ҳокимият органларининг мақомига алоҳида эътибор қаратилиб, ҳудудий бўлинмалар белгиланиб, уларни ташкил этиш ва тугатишнинг аниқ тартиби белгиланди.
Барча вазирлик ва идораларда тегишли соҳа ва тармоқларни ривожлантириш бўйича белгиланган кўрсаткичларга еришишга қаратилган ишларни самарали ташкил этиш ҳам мустаҳкамланмоқда.
Ҳаракат дастурлари ва ҳудудларни ривожлантириш дастурлари ижроси юзасидан Олий Мажлис, Ўзбекистон Республикаси Президенти ва жамоатчилик олдидаги шахсий жавобгарлик муҳим жиҳатдир.
Мазкур қонун лойиҳасининг қабул қилиниши Вазирлар Маҳкамаси фаолияти самарадорлигини ошириш, замонавий механизмларни жорий этиш, ҳукумат аъзоларининг давлат сиёсатини амалга ошириш ва белгиланган йўналишларда аниқ натижаларга эришиш учун масъулиятини кучайтириши кутилмоқда.
Бу ҳам Вазирлар Маҳкамасининг ваколатларини янада аниқ белгилаш, унинг соҳа ва ҳудудларни ривожлантириш бўйича масъулиятини кучайтиришга хизмат қилмоқда.