Шавкат Мирзиёевнинг Қирғизистонга ташрифи май ойининг охирига режалаштирилган

Жорий йилнинг май ойида Ўзбекистон Президенти Шавкат Мирзиёев Қирғизистон Республикасига ташриф буюради.

Бу ҳақда Президент Садир Жапаров “Кабар”га берган интервюсида маълум қилди.

“Қозоғистон президенти Қосим-Жўмарт Токаев 26 май куни Қирғизистонга ташриф буюради. Шу куни тушдан кейин Ўзбекистон Президенти Шавкат Мирзиёев ташриф буюради”, — деди у.

Шунингдек, 27 май куни ЕОИИга аъзо давлатларнинг барча президентлари Қирғизистонга келиши маълум бўлди.

Эслатиб ўтамиз, 14-апрел куни Садир Жапаров Ўзбекистон Бош вазири ўринбосари – Инвестициялар ва ташқи савдо вазири Сардор Умурзоқовни қабул қилди.

Сўнгра давлат раҳбари Президент Шавкат Мирзиёевнинг жорий йил май ойи охирида кутилаётган жавоб ташрифини мамнуният билан қайд этиб, Қирғизистон-Ўзбекистон олий даражадаги музокаралари мамлакатлар ўртасидаги муносабатларни ривожланишнинг кейинги сифат босқичига олиб чиқишига ишонч билдирди.