Ўзбекистон раҳбари Шавкат Мирзиёев 21-22 ноябрь кунлари расмий ташриф билан Франция Республикасида бўлади.
Сафар Франция президенти Эммануэл Макроннинг таклифига биноан амалга оширилади.
Давлатимиз раҳбарининг Францияда бўлиши дастуридан юқори даражадаги икки томонлама музокаралар, Миллий ассамблея – Франция парламенти қуйи палатасидаги учрашувлар, шунингдек, Франциянинг етакчи компания ва банклари раҳбарлари иштирокида ишбилармонлик тадбирлари ўрин олган.
Президент матбуот хизмати хабарига кўра, кун тартибидан конструктив сиёсий мулоқотни янада ривожлантириш, кўп қиррали ҳамкорликни кенгайтириш, биринчи навбатда, иқтисодиётнинг турли тармоқларида инвестисия лойиҳаларини амалга ошириш, фаол гуманитар ва таълим алмашинувларини давом эттириш масалалари кўриб чиқилади.
Саммит якунлари бўйича ўндан ортиқ муҳим икки томонлама ҳужжатлар, шунингдек, сармоявий битимлар ва савдо шартномалари тўпламини қабул қилиш режалаштирилган.
Бундан ташқари, Шавкат Мирзиёев ташрифи доирасида Париждаги Лувр музейи ва Араб дунёси институтида Ўзбекистоннинг энг бой маданий-тарихий меросига оид ноёб кўргазмалар очилади.
Шунингдек, ҳозир Парижда MEDEF Франция тадбиркорлар ҳаракати кўмагида ташкил этилган бизнес-форум бўлиб ўтмоқда.