Қатарга амалий ташрифи доирасида Олий Мажлис Сенати Раиси Танзила Нарбаева ва Қатар Шўро кенгаши раиси Хасан бин Абдулла ал-Ғаним ўртасида учрашув бўлиб, унда Ўзбекистон ва Қатар ўртасидаги муносабатлар ҳамкорликни ривожлантириш истиқболлари муҳокама қилинди.
Учрашувда парламентлар, қўмиталар ва дўстлик гуруҳлари раҳбарлари даражасида мулоқотни фаоллаштириш, ўзаро қўллаб-қувватлаш ва ҳаракатларни мувофиқлаштиришни кучайтириш, шунингдек, икки томонлама ҳужжатларнинг биргаликда мониторингини олиб бориш каби кўплаб таклифлар билдирилди.
Сенат Раиси Ўзбекистон Қатар билан ўзаро ҳамкорлик ва ҳамкорликни ривожлантиришни устувор вазифа деб билишини, парламентлараро мулоқотни фаоллаштиришда «дўстлик гуруҳлари» муҳим ўрин тутишини таъкидлади. Ўз навбатида, Хасан бин Абдулла ал-Ғаним икки давлатнинг биргаликдаги саъй-ҳаракатларини бирлаштирган ҳолда парламентлараро алоқаларни янги босқичда мустаҳкамлашга тайёрлигини билдирди.
Бундан ташқари, Ўзбекистон ва Қатар ўртасидаги ҳамкорликнинг бошқа йўналишлари, жумладан, савдо-иқтисодий, сармоявий, транспорт-коммуникация, маданий-гуманитар соҳалардаги алоқаларни мустаҳкамлаш масалалари муҳокама қилинди. Қатарнинг икки давлат ўртасида зиёрат туризмини ривожлантириш бўйича таклифлари билдирилди.