Ўзбекистон инвестициялар, саноат ва савдо вазири Лазиз Қудратовнинг Озарбайжон Республикаси Иқтисодиёт вазири Микоил Жабборов билан Боку шаҳрида бўлиб ўтган учрашувида мамлакатлар ўртасида сармоя ва савдо соҳасида ҳамкорлик чуқурлашиб бораётгани маълум бўлди.
Мулоқот чоғида сўнгги бир неча йил ичида Ўзбекистон-Озарбайжон ҳамкорлигининг ижобий динамикаси таъкидланди, бу икки давлат раҳбарларининг ишончли муносабатлари ва доимий мулоқоти туфайли имкони бўлди.
Жорий йилнинг феврал ойида Тошкент шаҳрида бўлиб ўтган икки давлатнинг I минтақалараро форуми юксак самаралар бергани кенг кўламли ҳамкорликни ривожлантиришга катта туртки бергани таъкидланди.
Томонлар ўзаро инвестиция соҳасидаги ҳамкорликни чуқурлаштириш истиқболларига эътибор қаратдилар. Бу жараёнда ташкил этилган Ўзбекистон-Озарбайжон сармоя фонди алоҳида ўрин тутишга даъват этилгани алоҳида таъкидланди.
Ўзбекистон тажрибаси асосида Озарбайжонда тўлиқ ишлаб чиқариш сиклидаги пахта-тўқимачилик кластерларини ташкил этиш бўйича келишувга эришилди. Шунингдек, ипакчилик ва машинасозлик йўналишларида илгари келишилган лойиҳаларни илгари суришнинг бориши кўриб чиқилди.
Ўзаро савдога келсак, унинг ҳажмини 1 миллиард долларга етказиш режалаштирилган. Бундан ташқари, томонлар саноат, энергетика, қишлоқ хўжалиги, кичик ва ўрта бизнес, транспорт, транзит ва бошқа соҳалардаги алоқаларни ривожлантириш истиқболларини муҳокама қилдилар, деб хабар қилди Инвестициялар, саноат ва савдо вазирлиги ахборот хизмати.
Расмий статистик маълумотларга кўра, 2023-йилнинг 1-чораги якунларига кўра, Озарбайжон ҳали Ўзбекистон ташқи савдо айланмасида йигирмата йирик ҳамкор давлатлар қаторига кирмаган.