Президент Джо Байден маъмурияти Ўзбекистондан АҚШга одамларни олиб ўтишга уринган жиноий тармоққа қарши чоралар кўрилганини эълон қилди.
Миллий хавфсизлик кенгаши баёнотига кўра, ушбу тармоқ иштирокчиларидан камида биттаси хорижлик террор ташкилотига алоқадор бўлган, аммо қайси бири аниқланмаган.
Бироқ, АҚШ расмийлари бу «Исломий давлат» эканига ишора қилмоқда.
Шунга қарамай, АҚШ расмийлари контрабандадан фойдаланган Ўзбекистон фуқароларининг террорчилар билан алоқаси борлигини ёки террорчилик ҳужумларини режалаштирганини даъво қилмайди.
Қўшма Штатлар, шунингдек, ушбу контрабанда тармоғининг асосий аъзоларини, жумладан, хорижий террорчилар билан алоқаси бўлганларни қўлга олиш учун бошқа давлатлар билан ҳамкорлик қилгани ҳақида хабар берди.