Андижонда тадбиркор ўзини осди

Хабарларда айтилишича, марҳум «Такомил қурилиш сервис» МЧЖга раҳбарлик қилган, қурилиш ишлари билан шуғулланган. У қураётган спортзалида ўзини осган. Қайд этилишича, ўлимидан бир кун олдин 250-300 киши иштирок этган йиғилишда туман ҳокими ва прокурори уни ҳақоратлаб, камситган.

Андижон вилояти ҳокимлиги матбуот хизмати туман ҳокимлигида 200-300 кишилик йиғилиш ўтказилмаганини маълум қилди. Уларга кўра, ҳоким ва прокурор тадбиркорга босим ўтказмаган.

Шунингдек, тадбиркорга қурилаётган объект қийматининг 85 фоизи берилгани маълум бўлди.

«Тадбиркор ёрдам сифатида 250 миллион сўм сўраган. Унинг мурожаатига жавобан, вилоят ҳокимининг фармойишига асосан, тадбиркорга қўшимча 350 миллион сўм (жами 600 миллион сўм) ажратиш масаласи кўриб чиқиш учун киритилди. Бу масала халқ депутатлари Кенгашининг ўн кунлик муҳокамасига киритилди», — дейилади вилоят ҳокимлиги матбуот хизмати хабарида.

Вилоят прокуратурасининг хабар беришича, 20 август куни Жалақудуқ туманидаги 29-умумтаълим мактабининг спортзалида Улуғнор туманида яшовчи тадбиркор ўзини осган.

Ҳозирда прокуратура суриштирув ишларини олиб бормоқда.