Яқинда ижтимоий тармоқларда юк машинаси тўхтай олмай, олтита машина билан тўқнашиб кетгани акс этган видео пайдо бўлди.
Ушбу ҳодиса тафсилотлари ҳақида Тошкент вилояти ИИБ ҳузуридаги Давлат автомобил инспекцияси матбуот хизмати вакиллари маълум қилди.
Расмий маълумотларга кўра, ҳодиса Тошкент вилоятининг Бўстонлиқ туманида содир бўлган. «Тошкент – Чорвоқ» йўналишида ҳаракатланаётган «Маз» юк машинасини 1986-йилда туғилган Ж.A. исмли ҳайдовчи бошқарган.
Автомобил ҳайдаб кетаётиб, тормоз тизими ишламай қолганлиги сабабли олтита автомобил билан тўқнашиб кетган. ЙТҲларда Spark, Матиз, Nexia-3, Kia Sportage ва иккита Lacetti автомобиллари иштирок этган.
Матбуот хизмати вакилларининг қайд этишича, ушбу ҳодиса натижасида йўл ҳаракати қатнашчиларидан ҳеч бири жабрланмаган. Бироқ, барча автомобиллар турли хил техник шикастланган.
Ҳозирда ҳуқуқ-тартибот идоралари ҳодиса юзасидан суриштирув ишларини олиб бормоқда.