Пойтахтда аёл қаҳвахонада эркакни пичоқлади

Пойтахтдаги кафелардан бирида ошхонада келиб чиққан жанжал оқибатида эркакнинг жигарига пичоқ уриб жароҳат етказган, натижада у омон қолмаган.

2022-йил 4-сентабр куни соат 00:30 атрофида пойтахтимизнинг Яшнобод тумани Тўрариқ кўчасида жойлашган оилавий кафеда ишлаган 26 ёшли аёл К.Ғ. ишдаги ҳамкасби 28 ёшли М.С. билан жанжаллашиб қолган, маълум бўлишича, М.С. спиртли ичимлик таъсирида бўлган.

ИИВ Тергов бошқармаси хабарига кўра, улар ўртасидаги жанжал оқибатида аёл ошхона пичоғи билан эркакнинг ошқозонига урган. Натижада 28 ёшли йигит касалхонага олиб кетилаётганда йўлда вафот этган.

Суд-тиббий экспертиза хулосасида марҳумнинг «қорин бўшлиғининг ўнг олд деворига ўтиб, жигари шикастланган, ички ва ташқи қон кетишига сабаб бўлган пичоқ жароҳати» олгани кўрсатилган.

Мазкур ҳолат юзасидан 26 ёшли аёлга нисбатан Ўзбекистон Республикаси Жиноят кодексининг 104-моддаси 3-қисми «д» банди (Қасддан баданга оғир шикаст етказиш, жабрланувчининг ўлимига сабаб бўлса) билан жиноят иши қўзғатилган, гумонланувчи процессуал тартибда қолга олинган.