Коррупцияга қарши курашиш агентлиги халқаро ва миллий експертлар билан фаол ҳамкорликда Коррупцияни идрок этиш миллий индексини шакллантиришнинг ўзига хос методологиясини ишлаб чиқди.
Ушбу методология Коррупцияга қарши курашиш миллий кенгаши томонидан тасдиқланган, дея хабар беради агентлик матбуот хизмати.
Методика аҳолининг турли қатламлари, тадбиркорлар ва експертлар ўртасида социологик сўровлар ўтказиш, шунингдек, мурожаатлар ва статистик маълумотларни таҳлил қилиш, сўнгра натижаларни умумлаштиришни ўз ичига олган комплекс тадқиқотлар ўтказишдан мақсадни белгилайди.
Тадқиқотни бир неча босқичда ўтказиш режалаштирилган: биринчи босқичда аҳоли, тадбиркорлар ва мутахассислар орасида ўртасида сўровнома ташкил этилади, коррупцияга оид жиноятлар ва мурожаатлар бўйича статистик маълумотлар таҳлили, иккинчи босқичда эса сўров ўтказилади.
Амалга оширилаётган тадқиқотлар ва унинг холислиги халқаро миқёсда эътироф етилишини таъминлаш мақсадида Ўзбекистон Республикасида коррупцияни идрок этиш миллий индексини шакллантириш бўйича Эксперт кенгаши тузилди. Ушбу кенгаш таркибига халқаро експертлар ҳамда миллий ҳокимият ва фуқаролик жамияти институтлари вакиллари киради.
Ўрганишнинг якуний натижалари, таҳлилий хулосалар, шунингдек, коррупция хавфи юқори бўлган ҳудудлар ва тармоқлар рўйхати агентликнинг расмий веб-сайтида эълон қилинади.
Ушбу тадқиқот коррупция билан боғлиқ вазиятни тизимли таҳлил қилиш, коррупция хавфи юқори бўлган соҳаларни ва коррупцияга оид ҳуқуқбузарликларнинг асосий сабабларини аниқлаш учун зарур шарт-шароитларни яратади. Бу турли соҳа ва ҳудудлардаги раҳбарларнинг масъулиятини кучайтиришга ҳам хизмат қилмоқда.
Шунингдек, жамият ва давлат ҳаётининг барча жабҳаларида коррупцияга қарши курашиш борасидаги давлат сиёсати юзасидан аҳолидан фикр-мулоҳазалар ва тавсиялар олиш коррупцияга қарши курашиш ва унинг профилактикасини назорат қилиш бўйича аниқ чора-тадбирлар белгилаш, шунингдек, ушбу жараёнларга жамоатчиликни кенг жалб этиш имконини беради.