Самарқанд вилоятининг Пахтачи туманида пиёданинг ўлимига сабаб бўлган мудҳиш йўл-транспорт ҳодисаси қайд этилди.
Ҳодиса 3-январ куни соат 20:00 атрофида М-37 автомагистралининг 137-километрида содир бўлиб, Gentra русумли автомашина ҳайдовчиси йўлнинг тартибга солинмаган қисмини кесиб ўтаётган фуқарони ўлдириб юборди.
Воқеа ҳақида вилоят ИИБ Йўл ҳаракати хавфсизлиги бошқармаси матбуот хизмати хабар берди. Воқеа тафсилотларига кўра, пиёда олган тан жароҳатлари натижасида воқеа жойида вафот этган.
Таъкидлаш жоизки, мазкур ҳолат йўл ҳаракати хавфсизлигини таъминлаш масаласининг долзарблигини, пиёдаларнинг йўлни кесиб ўтишда қоидаларга риоя этиши зарурлигини кўрсатиб беради.
Мазкур фожиага сабаб бўлган ҳолатлар ва юзага келиши мумкин бўлган ҳуқуқбузарликларни аниқлаш мақсадида йўл ҳаракати хавфсизлиги бошқармаси ва вилоят ҳуқуқ-тартибот идоралари томонидан мазкур йўл-транспорт ҳодисаси юзасидан суриштирув ишлари олиб борилмоқда.