Россияга қарши Европа санкцияларининг 12-пакети 30 дан ортиқ компанияларни, жумладан Ўзбекистон, Қозоғистон ва Сингапур корхоналарини, шунингдек, Россиянинг бир қанча муҳандислик ташкилотларини ўз ичига олиши мумкин. Европа Иттифоқи бу ҳафта ушбу мавзуни муҳокама қилишни режалаштирмоқда.
Агентлик маълумотларига кўра, қурол ишлаб чиқариш учун ишлатилиши мумкин бўлган станоклар ва тегишли қисмларни Россияга экспорт қилишни тақиқлашни жорий этиш режалаштирилмоқда.
Санкциялар пакети, шунингдек, Россия олмосларини етказиб беришни тақиқлаш ва ўтган йилнинг декабр ойида Ғарб давлатлари томонидан бир баррел учун 60 доллар қилиб белгилаган Россия нефти нархининг юқори чегарасига қўшимча чекловларни ўз ичига олади.
Таклифлар, шунингдек, кимёвий маҳсулотлар, литийли аккумуляторлар, термостатлар ва моторларни, жумладан, дронларда фойдаланиш учун етказиб беришни тақиқлашни ҳам ўз ичига олади. Суюлтирилган пропан, қуйма темир, шпигелеисен, мис ва алюминий сим, фолга, қувур ва арматура импорти учун санкциялар муҳокама қилинмоқда.
Россия олмосларини олиб киришга тақиқ 1 январдан кучга кириши мумкин. Шунингдек, учинчи мамлакатларда қайта ишланган рус олмосларини олиб киришга билвосита тақиқни босқичма-босқич жорий этиш режалаштирилмоқда.
G7 мамлакатлари (Буюк Британия, Канада, Франция, Германия, Италия, Япония ва АҚШ) ташқи ишлар вазирлари ўртасида Россия олмосларига нисбатан чекловлар бўйича келишув ўтган ҳафта якунланмади.
Санкциялар пакети, шунингдек, россияликларга крипто-активларни сақлаш хизматларини кўрсатувчи Европа компанияларидаги лавозимларни тақиқлаш, россияликларга тегишли бўлган ёки улар томонидан назорат қилинадиган Европа компанияларидан Европа Иттифоқидан маблағ ўтказиш учун рухсат сўрашни талаб қилиш ва бошқа чораларни ўз ичига олади.
Шунингдек, экспорт қилувчилар учун шартномаларга Россиядан айрим товарларни реэкспорт қилишни тақиқловчи қоидаларни киритиш талабини жорий этиш режалаштирилмоқда.